“Шарқ”, “Насаф” ва “Ўзбекистон” поездларининг чипталар нархи 25%га ошмоқда.

1 июлдан “Шарқ”, “Насаф” ва “Ўзбекистон” поездларининг чипталар нархи 20% га ошмоқда. Бу ҳақда “Ўзтемирйўлйўловчи” матбуот хизмати хабар берди.

Қайд этилишича, йўловчи поездларда қўшимча сервис хизматларини жорий этиш, уларни янада ривожлантириш, йўловчи вагон паркларини янгилаш, модернизация қилиш, янги электропоездларни харид қилиш, вокзалларни замон талабларига мослаштиришни ҳисобга олган ҳолда чипталар нархига ўзгартиришлар киритилмоқда.

Унга кўра, “Тошкент-Қарши” йўналишидаги поезд чиптаси эконом тарифида —178 250 сўм, бизнес тарифида —262 805 сўм қилиб белгиланмоқда.

Ҳозирда мазкур йўналишда чипта нархлари эконом — 150 600 сўм, бизнес — 218 244 сўмни ташкил қилмоқда.

2023 йилнинг 1 ноябридан йўловчи ташиш темир йўл чипта нархларига янги тариф белгиланганди.

Унга кўра, маҳаллий йўналишлардаги йўловчи поездлари чипта нархларининг тариф қисми 44%га, юқори тезликда ҳаракатланувчи “Афросиёб” электропоездлари чипталари эса 60% дан юқорироққа оширилганди.

Жорий йил 20 январдан маҳаллий йўналишлардаги темир йўл чипталари нархи яна оширилганди.

Хусусан, юқори тезликда ҳаракатланувчи “Афросиёб” электропоездлари ҳамда “Шарқ”, “Насаф” ва “Ўзбекистон” тез юрар поездларининг чипталар нархи 20%га оширилди.

Кейинчалик 15 майдан бошлаб юқори тезликда ҳаракатланувчи “Афросиёб” электропоездларининг чипталар нархларига янги тариф белгиланди.

Чипталар нархлари эконом класс учун 20%, бизнес классда 30% ва ВИП класс учун эса 40%га оширилди.