Пойтахт аэропортининг жўнаб кетиш терминалида меҳмонхона расман ўз фаолиятини бошлади. Бу ҳақда “Uzbekistan Airports” хабар берди.

Келтирилишичга, меҳмонхона жўнаб кетиш терминалининг кутиш залида, "Art Bazar" мажмуасининг чап томонида жойлашган. Меҳмонхонада икки қаватда 24 та кичик-хоналар мавжуд. Шунингдек, биринчи қаватда ювиниш ва хожатхона, рўйхатга олиш пештахтаси ва маълумот таблоси бўлади, ҳар бир хонада эса индивидуал бортга таклиф қилиш тизими мавжуд.

“Хоналар тўлиқ ўлчамли бир кишилик ётоқ ва минимал жиҳозлар — чироқ, ойна, кийим илгич, қўл юки учун жавон, стол билан жиҳозланган кичик шинам кабиналар каби қурилган. Меҳмонхонанинг моҳияти шундаки, йўловчи трансфер пайтида аэропортдан чиқмасдан ёки транзит зонасини тарк этмасдан бу ерда бир неча соат қолиши мумкин”, — дейилади компания матбуот хизматида.

E-auksion.uz электрон платформасидаги савдолар орқали умумий майдони 240 кв.м бўлган меҳмонхона хусусий компания бошқарувига ўтказилди ва "Khamsa Hotel" бренди остида фаолият юритади. Оператор томонидан белгиланган меҳмонхонадан фойдаланиш тарифлари фойдаланиш муддати ва хона классига қараб 30 дан 150 долларгача бўлади. 24 та хонадан 23 таси стандарт, 1 таси люкс хона бўлиб, оилавий йўловчилар учун мўлжалланган.