Уй ишчилари кимлар? Энага, боғбон, ошпаз каби ёлланиб ишлайдиганлар билан ҳам меҳнат шартномаси тузиш керакми? Уларнинг иш режими қандай бўлади? Уй ишчиларига меҳнат стажи ҳисобланадими? Hudud24.uz бугун шу каби саволларга жавоб беради.

1. Уй ишчилари кимлар?

Иш берувчи бўлган жисмоний шахсларга уларнинг тадбиркорлик фаолияти билан боғлиқ бўлмаган шахсий эҳтиёжларини қаноатлантириш учун ишларни бажарувчи, хизматлар кўрсатувчи ходимлар (боғбонлар, энагалар, қоровуллар, оқсочлар, ҳайдовчилар ва бошқалар) уй ишчиларидир.

2. Неча ёшдан уй ишчиси бўлиб ишлаш мумкин?

16 ёшдан.

3. Меҳнат шартномаси тузиладими?

Иш берувчи бўлган жисмоний шахс томонидан ёзма шаклда меҳнат шартномаси тузилади. Ва бу шартнома иш берувчи ва уй ишчиси ўртасида меҳнатга оид муносабатлар юзага келишига асос бўлади.

Шартнома икки кўринишда, яъни номуайян муддатли ёки муддатли меҳнат шартномаси бўлиши мумкин.

Меҳнат шартномаси уч нусхада тузилади, улардан бири иш берувчининг яшаш жойидаги давлат солиқ хизмати органига тақдим этилади, иккинчиси иш берувчида қолади, учинчиси эса ишчига берилади.

4. Уй ишчисининг иш ва дам олиш режими қандай?

Иш режими, дам олиш кунларини ва йиллик меҳнат таътилларини бериш тартиби ходим билан иш берувчи ўртасидаги келишувга кўра белгиланади.

Уй ишчиларини ҳар кунлик ёки ҳар ҳафталик дам олиш ёхуд йиллик меҳнат таътиллари даврида уй хўжалигида ёки уй хўжалиги аъзолари билан қолишга мажбурлаш тақиқланади.

5. Шартнома қандай бекор қилинади?

Уй ишчиси меҳнат шартномасини иш берувчини 7 календарь кун олдин ёзма шаклда огоҳлантирган ҳолда, ўз ташаббусига кўра бекор қилишга ҳақли. Ушбу огоҳлантириш муддати уй ишчиси ва иш берувчи бўлган хонадон эгаси ўртасидаги келишувга кўра қисқартирилиши мумкин.

Меҳнат шартномаси бекор қилинганда у бекор қилинган кундан эътиборан 3 иш кунидан кечиктирмай бу ҳақда иш берувчининг яшаш жойидаги давлат солиқ хизмати органини ёзма шаклда хабардор қилиши шарт.

6. Уй ишчиларига меҳнат стажи ҳисобланадими?

Уй ишчиларининг ёлланиб ишлаш бўйича иш даврлари агарда улар ижтимоий солиқни тўласа, ходимнинг меҳнат стажига киритилади. Бунда меҳнат стажини ҳисобга олиш ижтимоий солиқ тўланганлиги тўғрисидаги маълумотлар асосида амалга оширилади.

 

Лобар Розимова,

Hudud24.uz колумнисти