Ўзбекистон Республикаси Коррупцияга қарши курашиш агентлиги директори Акмал Бурхонов бошчилигидаги делегациянинг Грузияга ташрифи доирасида ушбу мамлакатнинг Коррупцияга қарши курашиш бюроси директори Разден Купрашвили билан учрашув бўлиб ўтди.

Учрашувда томонлар коррупцияга қарши курашиш борасида амалга оширилаётган ишлар бўйича фикр алмашди. 

Ўзбекистонда коррупцияга қарши курашиш давлат сиёсати даражасига кўтарилгани, давлат органлари фаолиятида очиқлик ва шаффофликни таъминлаш бўйича барча чоралар кўрилаётгани, давлат харидларида қонунийликни таъминлаш бўйича изчил ўрганиш ишлари йўлга қўйилгани қайд этилди. Манфаатлар тўқнашувига барҳам бериш учун алоҳида қонун қабул қилинди. 

Грузия коррупцияга қарши курашиш бюросининг асосий вазифалари коррупцияга қарши курашиш бўйича давлат сиёсатини шакллантириш, коррупцияга қарши курашиш стратегияси ва бошқа дастурий ҳужжатларни ишлаб чиқиш ҳамда ижроси устидан назорат қилишдан иборат. Шунингдек, давлат хизматчилари мол-мулки ва даромадларини декларациялаш ишларини мувофиқлаштириш, манфаатлар тўқнашувининг олдини олиш каби ишларни ҳам амалга оширади. 

Учрашув якунида икки идора ўртасида ўзаро ҳамкорлик меморандуми имзоланди. 

Меморандум доирасида коррупциянинг олдини олиш ва унга қарши курашиш соҳасида давлат сиёсатини шакллантиришда тажриба алмашилади. Ўзаро ахборот, меъёрий ҳужжатлар ва илмий манбалар алмашиш назарда тутилди. 

Кадрлар малакасини ошириш бўйича қўшма ўқув курслари ва тренинглар ўтказилади. Манфаатлар тўқнашуви ва бошқа коррупциявий ҳуқуқбузарликларнинг олдини олишнинг самарали механизмлари яратилади. 

Мулоқотда ўзаро ҳамкорликнинг шу каби ҳуқуқий ва амалий асосларини такомиллаштириш ҳар иккала томон учун самарали экани эътироф этилди.