Шунингдек, Тошкент давлат ўзбек тили ва адабиёти университети гендер тенглиги бўйича дунёда 10 ўринни эгаллади.

Ўзбекистондаги 7 та олий таълим муассасаси 2024-йил учун “THE Impact Rankings” рейтингида Топ-1000таликка киритилди. Бу ҳақда Олий таълим, фан ва инновациялар вазирлиги матбуот хизмати хабар берди.

Рейтинг университетларнинг БМТ томонидан белгиланган 17та Барқарор Ривожланиш Мақсадларига (БРМ) қўшган ҳиссасини таҳлил қилди.

Унда бу йил Ўзбекистоннинг 53та олий таълим муассасаси қайд этилди. Шулардан қуйидаги 7таси ТОП-1000 таликдан жой олди:

• Тошкент давлат ўзбек тили ва адабиёти университети — 301−400-ўрин;
• Тошкент давлат юридик университети — 401−600-ўрин;
• Ўзбекистон миллий университети — 601−800-ўрин;
• “ТИҚХММИ” Миллий тадқиқот университети — 601−800-ўрин;
• Самарқанд давлат университети — 801−1000-ўрин;
• Тошкент давлат техника университети — 801−1000-ўрин;
• Тошкент давлат иқтисодиёт университети — 801−1000-ўрин.

Рейтингда Тошкент давлат ўзбек тили ва адабиёти университети гендер тенглиги бўйича дунёда 10 ўринни эгаллади.

Маълумот ўрнида, 2021 йилда эълон қилинган “THE Impact Rankings” рейтингида юртимизнинг 10 та, 2022 йилда 30 та, 2023 йилда эса 47 та олий таълим муассасалари ўрин эгаллаган эди.