Янгиқўрғон туманидан 15 километр узоқликда жойлашган ҳудуд аҳолиси деҳқончилик ва боғдорчиликка меҳр қўйган. Улар давлат хизматларидан фойдаланиш учун туман марказига келар эдилар. Энди эса бунга ҳожат қолмади. Бекобод маҳалла фуқаролар йиғини биносида Янгиқўрғон туман давлат хизматлари марказининг “Бекобод” филиали ўз фаолиятини бошлади. Мазкур филиал Янгиқўрғон туманидаги Бўстон, Гулистон, Соҳил, Нуралиобод, Боғистон ва Чортоқ туманидаги Алихон, Арбағиш, Бозорбоши, Созсой, Тўпқайрағоч маҳалла фуқаролар йиғинида истиқомат қилувчи 21минг нафардан ортиқ аҳолига давлат хизматларини кўрсатади. Мўъжазгина бино очилишида сўз олган қишлоқ аҳли давлат хизматлари марказлари хизматларида ўз маҳаллаларида фойдаланиш имконият туғилганидан мамнун бўлдилар. — Мен 40 йилдан ортиқ вақт мобайнида маориф тизимида ишлаб келяпман. Сўнги 5 йил ичида рақамли технология ривожланиши кўплаб инсонларни югур-югурлардан ҳоли этди. Давлат хизматлари марказлари, шунингдек, ФҲДЁ бўлимларида хизмат кўрсатиш сифатига ҳам шу ахборот коммуникация ривожланиши ва агентлик тизимида олиб борилаётган ислоҳотлар сабаб ҳозирда фуқаролар сарсон бўлишига чек қўйилди. Президентимиз ташаббуси билан ташкил этилган янги тизим ўзини том маънода оқлади. Бундан 5-10 йил аввал давлат идоралари маҳаллангизга бориб, бизга нима хизмат дея қўлини кўксига қўйиб хизмат кўрсатади деса, мен тугул бирорта маҳалладошимиз ишонмаган. Мана шу кунларга ҳам етиб келдик. Янги филиал аҳолининг яхшилигига хизмат қилсин, — дейди қишлоқдаги 60-мактаб директори Носиржон Жўрабоев. Давлат хизматлари марказининг филиали очилишини эшитиб фуқаролар хизматдан фойдалангани ҳам келдилар. Шу куни бекободлик 10 нафар фуқаронинг узоғи яқин бўлди. Шу каби Уйчи туман давлат хизматлари марказининг “Жийдакапа” филиали ҳам очилди.  “Жийдакапа” филиали ҳафтанинг чоршанба, жума кунлари маҳаллада давлат хизматларини кўрсатади. Шунингдек, аҳоли ва тадбиркорларга бепул ҳуқуқий маслаҳатларни бериб боради.