Бугун, 11 май куни Ерга бир қатор кучли қуёш чақнашларидан сўнг 20 йил ичида биринчи марта юқори даражадаги магнит бўрони тушиши мумкин. Бу ҳақда Россия Фанлар академияси Коинот тадқиқотлари институти Қуёш астрономияси лабораторияси раҳбари Сергей Богачев маълум қилди.

Гап энг юқори бешинчи даражадаги магнит бўрони хавфи ҳақида бормоқда. Олимнинг аниқлик киритишича, уч кун ичида Қуёш томонидан Ерга тўртта “алоҳида катта” плазма булутлари ташланган. Улар 11 майга ўтар кечаси сайёранинг магнит майдонига тегиши мумкин бўлган ягона йирик объектга бирлашиши мумкин.

Олимлар бўрон энг юқори чўққисида камида G4.33 даражасига етишини тахмин қилмоқда. Шу билан бирга, унинг G5 даражасига эришиш эҳтимоли 15 фоизга баҳоланмоқда. Агар шундай бўладиган бўлса, магнит бўрони 2005 йилдан бери энг кучли бўлиб қолади

"Магнит бўрони - бу қуёш фаоллиги туфайли Ернинг магнит майдонидаги бузилиш. Бу ҳодиса магнит майдонда тебранишларга олиб келиши мумкин, бу эса ўз навбатида ўтказгичларда, жумладан, инсон танасида электр токларининг пайдо бўлишига олиб келади”, дейди Богачев. 

Унинг сўзларига кўра, уларнинг инсон саломатлигига таъсири тўлиқ ўрганилмаган.

Баъзи олимлар буни об-ҳаво сезгирлиги билан солиштиришади: об-ҳавога боғлиқ бўлган одамларда ноқулайлик, бош оғриғи ва кайфият ўзгариши мумкин. Бошқаларга эса таъсир аҳамиятсиз. Богачев об-ҳаво таъсир қиладиган одамларга кунлик режимга риоя қилишни ва тўғри дам олишни, стресс ва ортиқча ишламасликни, шунингдек, соғлиғини назорат қилишни ва керак бўлганда шифокор билан маслаҳатлашишни тавсия қилган.