Бугун, 16 октябрь куни Ўзбекистон миллий ҳамда олимпия терма жамоалари ўртоқлик ўйинларини ўтказишди. Биринчи бўлим сўнгида Веи Шихао хитойликларни ҳисобда олдинга олиб чиқди. Иккинчи бўлимнинг 77-дақиқасида рақиб жарима майдони ичида Аббосбек Файзуллаев пеналти ишлади. Отабек Шукуров 11 метрлик нуқтадан тепган тўп дарвозабонга тегиб қайтди ва қайтган тўпни Шукуровнинг ўзи дарвозага йўллади. 86-дақиқада эса Жамшид Искандеров Ўзбекистоннинг иккинчи голига муаллифлик қилди. Шу тариқа Сречко Катанец шогирдлари ғалабага эришди. Эслатиб ўтамиз, Ўзбекистон терма жамоаси 13 октябрь куни Ветнам устидан ишончли тарзда ғалаба қозонган эди. Ўртоқлик ўйини, 16 октябрь, душанба Хитой – Ўзбекистон 1:2 Голлар: 1:0 — 42 Веи Шихао, 1:1 78 Отабек Шукуров, 1:2 — 86 Жамшид Искандеров. Шунингдек, бугун Ўзбекистон U-23 терма жамоаси Миср ёшларига қарши ўртоқлик ўйини ўтказди. Учрашувнинг 27-дақиқасида Алишер Одилов ҳисобни очди. Иккинчи бўлимда ўзбекистонликлар бир киши кам бўлиб қолди. 73-дақиқада Билол Мазҳер ҳисобни тенглаштирди. Ўйин сўнгида эса Зиёд Муҳаммад узоқдан чап оёқда зарба бериб, Назаров дарвозасини ишғол қилди ва Мисрга ғалаба келтирди. Қайд этиш мумкин, 13 октябр куни Тимур Кападзе жамоаси Испания ёшларига қарши майдонга тушиб, 0:0 ҳисобида дуранг қайд этганди. Ўзбекистон U-23 – Миср U-23 1:2 Голлар: 1:0 — 27 Алишер Одилов, 1:1 — 73 Билол Мазҳер, 1:2 — 90 Зиёд Муҳаммад. Четлатиш: Маҳмуд Муҳаммаджонов (53).