Спам бу — зарарли дастурлар ва ёлғон маълумотларни ўзида жамлаган номаълум инсондан, номаълум ташкилотдан реклама кўринишига эга бўлган электрон ҳужжатдир. Спам хабарлар орқали фирибгарлар тузоғига тушиб қолмаслик мақсадида мутахассислар қуйидагиларга риоя этишни тавсия қилишади. – Спам хабарларга жавоб қайтарманг! Чунки ҳар қандай жавобингиз спамерлар учун сиз реал инсонлигингизни тасдиқлайди ва бундан кўра кўпроқ спам хабарлар олишингиз мумкин; – Спам хабарларда кўрсатилган ҳаволаларга кирманг! Чунки у ҳаволалар ортида сизнинг шахсий маълумотларингизни қўлга киритиши мумкин бўлган ёки зарарли дастурлар юкловчи қалбаки сайтлар яширинади; – Шахсий маълумотларингизни тақдим этманг! Ҳеч қайси ташкилот ёки банк Сиздан шахсий маълумотларингизни смс тарзида тақдим этишингизни сўрамайди; – Ташкилот ёки банкдан келган хабарларни аниқлаштириш учун тўғридан-тўғри расмий сайт орқали текширинг. Спам хабарлар тақдим этган иловалар орқали аккаунтингизни тасдиқлаш ёки у билан боғлиқ масалаларни расмий сайтлар орқали текширинг; – Спам хабарлар жўнатган рақамларни қора рўйхатга қўшиб қўйинг. Барча турдаги мобил қурилмаларда махсус қўнғироқ ва смсларни тақиқлаш учун қора рўйхатлар функцияси мавжуд.