Самарқандда 34 кг.га яқин гиёҳвандлик моддасини сақлаган шахс ушланди, Қашқадарёда эса икки фуқаронинг уйидан салкам 26 кг шу каби воситалар топилган. Ҳозирда ҳолатлар юзасидан ЖКнинг тегишли моддалари билан жиноят иши қўзғатилиб, тергов ҳаракатлари олиб борилмоқда.

Бундай жиноятлар учун қандай жавобгарлик бор?

Ўзбекистон Республикаси Жиноят кодексининг 273-моддасига кўра, гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб, кўп бўлмаган миқдорда қонунга хилоф равишда тайёрлаш, олиш, сақлаш, ташиш ёки жўнатиш, шунингдек уларни кўп бўлмаган миқдорда қонунга хилоф равишда ўтказиш 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.

Ушбу қилмишни содир этган шахс ўз ихтиёри билан айбини бўйнига олиш тўғрисида ҳокимият органларига арз қилса ва гиёвандлик воситалари, уларнинг аналоглари ёки психотроп моддаларни топширса, жазодан озод қилинади.

Агар юқоридаги қилмишлар озгинадан кўпроқ миқдорда содир этилган бўлса, 5 йилдан 7 йилгача озодликдан маҳрум қилиш билан жазоланади.

Шунингдек, ушбу жиноят илгари гиёвандлик воситалари ёки психотроп моддалар билан қонунга хилоф равишда муомала қилишдан иборат жиноятни содир этган шахс томонидан ёки бир гуруҳ шахслар томонидан олдиндан тил бириктириб содир этилса, озодликдан маҳрум қилиш тариқасидаги жазони ўташ жойларида ва ўқув юртларида ёки ўқувчилар, студентлар ўқув, спорт ва жамоат тадбирларини ўтказадиган бошқа жойларда содир этилган бўлса, 7 йилдан 10 йилгача озодликдан маҳрум қилиш билан жазоланади.

Ушбу қилмиш ўта хавфли рецидивист томонидан ёки уюшган гуруҳ томонидан ёки унинг манфаатларини кўзлаб содир этилган бўлса, 10 йилдан 15 йилгача озодликдан маҳрум қилиш билан жазоланади.

Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш эса 10 йилдан 20 йилгача озодликдан маҳрум қилиш билан жазоланади.